海洋公園

上次去海洋公園應該係7~8年前，當時無左荔園(我無咁老)，又未有迪士尼，主題公園基本上都係得海洋公園。而入得海洋公園，最主要o既目的都只係玩機動遊戲。印像中，玩一個機動遊戲閒閒地都排超過一個鐘，之後先玩得幾分鐘，所以會好珍惜。



事隔多年，終於有機會再入海洋公園。雖然大部份機動遊戲都係一樣，而且感覺上好似好舊，但玩起上黎仍然咁好玩。不過唔知係咪無咁多人玩，基本都唔駛點排隊。仲有唔知係咪人老左，對d動物興趣大左，會去睇下d魚同水母咁。之但係入到海洋館先點解無人玩機動遊戲，可能因為天氣太熱，d人都入晒去有冷氣o既地方，想慢慢睇下都唔得。另外，海洋劇場以前好似無咁「劇場」feel......係咪學左迪士尼要有故事性呢？不過最有趣o既係海洋劇場果個3語廣播，係3種語言混合出黎，即係三句連續o既對白，會係一句廣東話，一句英文同埋一句普通話。假如只識其中一種語言，咪好可能聽唔明個故事囉？

Hue Test

經常都有都癮科技睇下科技新聞o既習慣，今次見到一篇文講一個叫Hue Testo既野，簡單d黎講即係分辨顏色o既能力。玩法好容易，就係將四行o既色相都排列好，再click"Score Test"就有得睇結束。



經過十幾分鐘，玩到頭都就黎爆之後，排左呢個結果出黎：



結果....只係得30分，藍色同綠色都錯得幾多.....(越低分越好，0分即係無錯)

賞月

中秋節食過晚飯，入左赤柱賞月。近幾年都好少o係中秋節正日出街，因為四圍都咁多人，都唔知去邊好，寧願留o係屋企舒舒服服咁食住月餅，上下網，睇下電視。



入到赤柱行左個圈，幾年無黎過乜都幾晒，好在都仲認得少少路。中學旅行實在去得赤柱太多啦！行完之後去正灘，成個沙灘都係燭光同燈光，以前覺得好迫，但其實都幾靚丫！

中秋快樂

疊疊樂

由上而下：

新MP3：Sony NWZ-S618F (8GB)

舊MP3：Creative MuVo2 FM (5GB)

新電話：Asus P320

舊電話：Motorola E680i





新o既電話同MP3機，差不多價錢下，唔但止性能好左，Size都好左好多，最好就係薄左好多！

尋找青春

返左二個半月後，終於開學。係~係9月1號，已經有好幾年無o係9月1號開學。9月1號明明係屬於小學中學。不過巧合地今年9月1號係星期一，令到好多大學都選擇9月1號開學，個感覺都幾奇怪。(聽聞再早幾年試過早過8月尾開學，真係好悲！)



上個星期一同今晚都返左去學校上堂，唔太習慣要上堂呢個當然會有啦！不過呢兩個星期一去到學校附近，心裡面都暗暗諗起一句：「青春呀！」日日返工對住少數o既哥哥、姐姐，同埋大量o既Uncle、Auntie.....仲d Uncle、Auntie o既仔女都可能大個我，返工真係好dry！但係一返到學校，見到好多年紀差唔多既學生，個感覺完部唔同晒。最少，我地都同一個generation先啦！總好過去老人院~~



不過同其他同學傾呢個問題，唔知點解人做IT我做IT，人地對住d多數都係20~30歲，點解我對住果d大部份都係Uncle、Auntie~

OT

總係唔知點解有d人咁鍾意OT。如果係因為工作量大而OT，ok~咁只不過係佢上司對佢差。最唔明白o既係究竟點解d人早左返公司都仲要OT，我就唔信真係咁多野做。要OT o既最大原因，相信都係佢做得慢。明明係應該佢lead住我做野，佢又應該係孰手過我，做同一件事佢都可以耐過，令我終於明白佢要OT o既原因。