早餐

阿細佬係一個唔會食早餐o既人。無論係「白粥油炸鬼」定係「腸仔煎雙蛋」…. 其實並唔係唔鍾意食，只係永遠都唔會係起身刷牙洗面之後食。

幼稚園同小學都係讀下午班，返十二點半。起身o既時間多數都係九點幾十點，通常開電視睇重播緊o既閃電傳真機，睇完譚育英姐姐、麥包同朱茵扮老鼠先開始溫一陣書，跟住食埋飯就返學。食飯食得早，自自然然就無左食早餐o既需要。

到升左中學，永遠唔到最後一刻都唔會起身返學。食早餐？你不如俾我訓多十五分鐘仲好！要算係早餐o既，最多都係間唔中小息去小食部買果隻熱狗。不過後來小食部外判左，無左熱狗之後，小息都好少會食野，等到十二點半放lunch先食飯。

經過由細到大咁多年都無食早餐o既習慣，其實都好難改。雖然好多人都話唔食早餐對身體唔好，會無精神之類o既說話，但又點會咁容易改到？不過升到上U，食早餐o既機食同次數其實係多左。之但係呢d食早餐o既「機會」都只不過係因為要可能係九點十點起身食個飽，之後要到三、四點先再食個tea。實際上，都係因為太忙先會有呢種做法。而呢種做法，亦都只係變相將早餐同午餐分開兩次食。好定唔好？又會有邊個知？