丁噹+阿信 - 走火入魔

一開三

亞視經常都有一開五畫面，而睇呢個一開三o既即時賽果....真係好忙。

左上：女排決賽美國對古巴

右上：乒乓球男單決賽馬琳對王皓

下：男子十米跳板決賽

打風

今年好似特別多風球，已經試過一次放半日同一次放全日。但對於打緊黎o既"鸚鵡"，聽朝起身唔駛返工o既機會慢慢無少。返工都唔緊要，最慘聽日返返下工先黎掛8號風球，我唔想迫車返屋企。而最最最好當然係星期六掛8號啦！星期六返半日真係好無聊。

焦點

奧運舉行左差唔多一個星期，由討論李寧凌「空」跑500米點聖火到小朋友幕後代唱造假事件，大家o既注意力仍然留o係開幕禮上。其實由開幕禮前，集中點已經放o係中國o旣能力上，但好似忽略左運動員o既表現，運動會o既主角不是運動員嗎?其他o既事，睇完比賽先講啦！



p.s. 每晚返到屋企，都只會不停o係播奧運節目o旣台之間轉台，所以我仲未睇返儲存o係電腦裡面o既開幕禮。

奧運來了

因為出街食飯，開幕禮基本上都望左兩眼，好在返到屋企o岩o岩好夠鐘睇點聖火。今次個點聖火都幾型下，不過李寧要"跑"咁遠都應該好辛苦。

今次奧運好似都有好多直播睇，就算無數碼電視，兩個台都有唔同o既野睇，簡直好似睇緊收費o既體育頻道咁，拎住個remote不停轉台！不過TVB班人好嘈，所以如果無咩特別野都應該主要睇ATV。

我似好有錢咩？

曾經有一排，經常有唔同o既銀行寄信或者打電話走黎叫阿細佬借錢。一個無收入o既大學生都可以簽個名就借幾萬蚊。每次都會心諗，乜我似好大洗咩？雖然阿細佬窮，但都夠錢生活，夠錢交學費，唔駛你擔心。



不過近排d銀行又同我擔心另一樣野，就係我d錢太多，驚我唔識管理喎！其實我好多謝各大銀行o既擔心，但我係一個有自制能力、基本分析力o既人，阿細佬未必可以將我果雞碎咁多o既錢增值，但我最少可以keep到我o既資產囉！

停電

大熱天時停電，諗起都難頂.....話說上個星期某一個夜晚，o係街度收到屋企人用手提電話打俾阿細佬。通常屋企人o係屋企都會用返固網電話打俾我，原來今次咁特別o既係因為停電，太黑用唔到固網電話。收到電話，問左幾句，發覺唔係跳fuse咁簡單，立即用15分鐘返到屋企。



去到屋企樓下，見到大部份單位同樓梯都無燈，心之不妙。原來係大半座樓都無都電，得1/3單位有。結果好多平時見都未見過o既鄰居都走晒走廊，大家議論紛紛，仲風發現連隔離座樓都有影響，齊齊落街等待電力公司o既維修人員。大約過多半個鐘，維修人員到達後就返屋企等。停電o既晚上，有咩好做？無冷氣、無風扇、無電視睇。好在，仲有部有電o既notebook，可以滴住汗睇下裡面o既劇集。不過無得上網，原來真係悶好多。



最後，經歷左兩小時o既漆黑，終於「重光」！即係開返晒d電器，沖返個涼！假如連notebook都無，真係唔知呢2個鐘可以做咩！